काठमाडौं, २५ जेठ । राष्ट्रिय स्वतन्त्र पार्टीकी सांसद निशा डाँगीले पशुपति क्षेत्र लगायत बागमती नदीको दुर्दशा बदल्ने नाममा झन्डै २२ अर्ब पैसा बागमतीमा बगिसकेको बताएकी छन् । बिहीबार प्रतिनिधिसभाको बैठकको शून्य समयमा बोल्दै उनले एकातिर नदी सफाइमा वर्सेनी २ अर्बभन्दा बढी खर्च भइरहेको तर खोलानाला जस्ताको त्यस्तै रहेको बताइन ।

उनले खानेपानी ऐनले मलमूत्र खोलामा मिसाए तीन महिनादेखि १ वर्षसम्म कैद र पाँच लाखसम्मको जरिवानाको व्यवस्था गरे पनि त्यो दण्ड जरिवानाको भागिदार को हो ? भन्दै सभामुखमार्फत सम्बन्धित निकायको ध्यानाकर्षण गराएकी छन् ।

उनले भनिन्, ‘सभामुख महोदय, बागमती र अन्य नदीको नाममा अझ कति वर्षसम्म राजनीति अनि पैसा बगाउने काम हुन्छ यो देशमा रु बाग्मतीलगायत अन्य नदी सहरको दुर्दशा मात्र होइन, काठमाडौं उपत्यकावासीको साझा अनुहार हो । अझ म त भन्छु, यसले नेपाली राजनीति कै अनुहार चित्रण गर्छ । जसलाई संग्लो बनाउन निकै कठिन छ इमानदारिता नभएर ।

पशुपति क्षेत्रलगायत वाग्मती नदीको दुर्दशा बदल्ने भनेर हालसम्म झन्डै २२ अर्ब पैसा बागमतीमा बगिसकेको छ। आश्चर्यको कुरा त, एकातिर नदी सफाइमा वर्सेनी २ अर्बभन्दा बढी खर्च गरिन्छ । तर खोलानाला जस्ताको तस्तै देख्छु म । खानेपानी ऐनले मलमूत्र खोलामा मिसाए तीन महिनादेखि १ वर्षसम्म कैद र पाँच लाखसम्मको जरिवानाको व्यवस्था गरेको छ ।

यो दण्ड जरिवानाको भागिदार को हो ? ढल व्यवस्थापनको जिम्मा लिएका स्थानीय तह, अधिकार सम्पन्न वाग्मती सभ्यता, एकीकृत विकास समिति कि, स्वयम् स्थानीय ? गुह्येश्वरी, सल्लाघारी, कोड्कु, सुन्दरी घाट, खोकनामा बनाउने भनिएको ढल प्रशोधन केन्द्र, गुह्वेश्वरीबाहेकको वित्तीय र भौतिक प्रगति हेर्दा डिप्रेसनको सिकार हुने अवस्था छ। त्यसैले सभामुखमार्फत सम्पूर्ण निकायको ध्यानाकर्षण गर्न चाहन्छु ।’