काठमाडौं,पर्यटन तथा हवाइ यातायात समितिले होटल व्यवसायलाई उद्योग सरह सेवा सुविधा दिन माग गरेका छन्।नेपाल उद्योग वाणिज्य महासंघ अन्तर्गतको उक्त समितिले उद्योग मन्त्री रमेश रिजाललाई होटल व्यवसायलाई उद्योग सरह सेवा सुविधा दिनमा माग गरेको हो। व्यवसायीले होटल क्षेत्रमा ठूलो पूँजी लगानी गरी लाखौँलाई रोजगारी दिनुका साथै राज्यमा ठूलो परिमाणमा विदेशी मुद्रा आर्जन गरी मुलुकको कुल ग्राहस्थ उत्पादनमा समेत टेवा पुर्याएको छ, मन्त्री रिजाललाई ज्ञापन पत्र बुझाउँदै समितिका सभापति देशबन्धु वस्नेतले भने, तसर्थ यस क्षेत्रलाई राष्ट्रिय प्राथमिकता प्राप्त उद्योगमा वर्गीकरण गरी उत्पादनमूलक उद्योग सरह मान्यता दिन आग्रह गरेको छ।
यस क्षेत्रलाई औद्योगिक व्यवसाय ऐन २०७६ मा पर्यटनमा मात्र वर्गीकरण नगरी राष्ट्रिय प्राथमिकता प्राप्त उद्योग क्षेत्रमा समावेश गरी उत्पादनमूलक उद्योग सरहको सुविधा दिन उक्त समितिको माग छ।साथै होटल व्यवसायका लागि विद्युतको सहुलियत दर रेट करमा विशेष छुट सहित उद्योग सरहको सुविधा उपलब्ध गराउन उक्त समितिले आग्रह गरेको छ। समितिले होटल व्यवसायमा विदेशी लगानी भित्र्याउन हाल भएको विदेशी लगानी तथा प्रविधि हस्तान्तरण ऐन २०७५ परिमार्जन गर्नुपर्ने माग अघि सारेको छ।अहिले ऐनमा व्यवस्था भए अनुसार कुल बिक्रीको ५ प्रतिशतभन्दा बढी रोयल्टी शुल्क बढी नहुने गरी पठाउन मात्र पाउने प्रावधानले मुलुकमा अन्तर्राष्ट्रिय होटल रिसोर्टको सञ्चालन हुन कठिन देखिन्छ, समितिले मन्त्रीलाई बुझाएको ज्ञापनपत्रमा उल्लेख छ ।
अन्तर्राष्ट्रिय ब्राण्डका होटलहरूले ५ प्रतिशतभन्दा कम मूल्यमा सञ्चालन नगर्ने भएकाले सो क्षेत्रमा विदेशी लगानी भित्र्याउन सकिँदैन।होटल व्यवसायमा विदेशी ब्राण्ड र लगानी र पर्यटक भित्र्याउन ऐनमा भएको उक्त प्रावधान तत्काल हटाउनुपर्ने बस्नेतले बताए। उद्योग मन्त्री रमेश रिजालले प्रतिनिधिमण्डलको ज्ञापनपत्रको अध्ययन गर्ने र समस्या समाधानका लागि महत्वपूर्ण भूमिका खेल्ने गरी प्रतिवेदन तयार गर्न सचिव र महानिर्देशकलाई अनुरोध पनि गरेका छन्। मन्त्री रिजालसँगको भेटमा पर्यटन तथा हवाई समितका सल्लाकार तथा सदस्यहरूको पनि उपस्थिती थिए।
