काठमाडौं, श्रावण ३२। इजाजत पत्र नलिई वैदेशिक रोजगार व्यवसाय सञ्चालन गर्ने २ मेनपावर व्यवसायीलाई कारबाही गरिएको छ। वैदेशिक रोजगार विभागले वैदेशिक रोजगार ऐन २०६४ बमोजिम इजाजत पत्र नलिई सञ्चालनमा रहेका दुई मेनपावर व्यवसायीलाई जनही २ लाख जरिवाना गरिएको हो। स्वीकृतिविना सामाजिक सञ्जालको प्रयोग गरी वैदेशिक रोजगारीमा पठाइदिने भन्दै विज्ञापन गरी राहदानी संकलन गरेको पाइएपछि क्यापिटल रिक्युटमेन्ट सर्भिसेज र इगल मेनपावर कन्सलटेन्टलाई जनही २ लाख जरिवाना गरिएको हो ।

त्यस्तै सामाजिक सञ्जालमा विज्ञापन गर्दै सर्वसाधारणमा भ्रम सिर्जना गर्ने ललितपुरका दुईवटा सुयान एजुकेशन प्राली र एलाईट टु वर्क ह्युमन रिसोर्सेस हस्पिटालिटी एण्ड ट्रेनिङ सेन्टरमा विभागले अनुगमन गरेको छ । स्थलगत अनुगमन गरी आवश्यक कागजात नियन्त्रणमा लिई थप अनुसन्धान भइरहेको विभागले बताएको छ । कानुन विपरीत हुनेगरी सामाजिक सञ्जालमा सूचना सम्प्रेषण नगर्न समेत सबैमा अनुरोध गरेको छ । वैदेशिक रोजगारीमा हुने ठगी नियन्त्रणमा विभाग आक्रामक बन्दै गएको छ ।

केही दिन अगाडि पीडितलाई क्षतिपूर्ति नदिने दुई मेन पावरको इजाजत पत्र नै रद्ध गरेको थियो । विभागका महानिर्देशक मदन दाहालले वैदेशिक रोजगारीमा हुने ठगी कम गर्न विभाग कानुन अनुसार अगाडि बढिरहेको बताए । कानूनले दिएको अधिकारको प्रयोग नगर्दा समेत समस्या देखिएको भन्दै विभाग ठगी नियन्त्रणमा निर्मम हुनैपर्ने बताएका छन् ।