काठमाडौं । करिब २ महिनायता सवारीचालक अनुमति पत्र (लाइसेन्स)को पूर्ण छपाइ कार्य रोकिएको छ । यातायात व्यवस्था विभागका अनुसार ठेक्का पाएको जर्मन कम्पनीले समयमै कार्ड डेलिभरी नगर्दा छपाइ कार्य प्रभावित भएको हो । अहिले वैदेशिक रोजगारमा जाने र अत्यावश्यक पर्नेहरुका लागि मात्रै फाट्टफुट्ट कार्ड छपाइ हुने गरेको छ ।
अन्यका लागि नियमित रुपमा हुने ठूलो परिमाणको छपाइ कार्य २ महिनादेखि रोकिएको हो । लाइसेन्स छपाइ कार्य रोकिएपछि ट्रायल पास भएका तथा नवीकरण हुने पर्खाइमा रहेका करिब ८ लाख प्रभावित भएका छन् ।
‘अहिले विदेश जानेहरुलाई मात्रै अत्यावश्यक पर्ने भएकाले छपाइ गरेर दिने गरेका छौं, त्योबाहेक छपाइ कार्य अहिले करिब रोकिएको अवस्था छ’ विभागका निर्देशक रामचन्द्र पौडेलले बताए ।
उनका अनुसार ८ लाख कार्ड प्रिन्ट गरेर वितरण गर्नुपर्ने दायित्व छ । ठेक्का पाएको जर्मन कम्पनीले १२ लाख कार्ड डेलिभरी गर्नुपर्नेमा नगरेको उनले बताए । दसैंअघि नै १२ लाख कार्ड आउने थप अरु कार्डका लागि टेन्डर प्रक्रिया अघि बढाउनेगरी गृहकार्य भइरहेको उनले बताए ।
कार्डको स्टक संख्या १ लाखभन्दा मुनि झरेपछि नियमित छपाइ हुन नसकेको उनको भनाइ छ । ‘एकै पटक ठूलो संख्यामा कार्ड किनेर नराख्दा यो समस्या आएको हो’ उनले भने ‘टेन्डर भइसकेपछि डेलिभर हुने समय लम्बियो ।’
