काठमाडौं, ३२ । कोशी प्रदेश सरकारले ३६ अर्बको बजेट सार्वजनिक गरेको छ । आन्तरिक मामिला तथा योजना मन्त्रालयको जिम्मेवारीसमेत सम्हालेका मुख्यमन्त्री हिक्मतकुमार कार्कीले बिहीबार मन्त्रालयको सभाहलमा अध्यादेशमार्फत ल्याएको बजेट सार्वजनिक गरेका छन् ।
उनले आउँदो आर्थिक वर्ष २०८०र०८१ का लागि ३६ अर्ब २४ करोड ३५ लाख १० हजार रुपैयाँको अनुमानित बजेट सार्वजनिक गरेका हुन् । जसमा चालु खर्चमा १४ अर्ब ३९ करोड ६२ लाख ६६ हजार, पुँजीगततर्फ १८ अर्ब २३ करोड ४२ लाख ५२ हजार र वित्तीय हस्तान्तरणतर्फ १ करोड र स्थानीय तहमा वित्तीय हस्तान्तरणमा ३ अर्ब ६० करोड २९ लाख ९२ हजार बजेट विनियोजन गरिएको छ । बजेटको स्रोततर्फ आन्तरिक ४ अर्ब ५७ करोड ७८ लाख ५० हजार र राजस्व बाँडफाँडबाट ११ अर्ब ६४ करोड ८१ लाख, संघीय अनुदानबाट १५ अर्ब ३६ करोड ४६ लाख, नगद मौज्दात ३ अर्ब ७५ करोड १ लाख र वैदेशिक अनुदानबाट १५ करोड ४ लाख ६० हजार आयको अनुमान उनले प्रस्तुत गरेका छन् ।
कृषिको आधुनिकीकरण गरेर रोजगारी सिर्जना गर्ने लक्ष्यका साथ ल्याइएको बजेटमा कृषि क्षेत्रका लागि २ अर्ब ७ करोड बजेट विनियोजन गरिएको छ । उद्योगतर्फ ४३ करोड, भौतिक पूर्वाधारतर्फ ११ अर्ब ४१ करोड २६ लाख, खानेपानी, सिँचाई तथा उर्जातर्फ ५ अर्ब ४३ करोड ८३ लाख बजेट विनियोजन गरिएको छ ।
यस्तै, स्वास्थ्यतर्फ ३ अर्ब ७ करोड २७ लाख, सामाजिक विकासतर्फ १ अर्ब ७९ करोड ३३ लाख, श्रम तथा रोजगार, भूमि व्यवस्था, वन, वन्यजन्तुल तथा जैविक विविधता, पर्यटनलगायत क्षेत्रमा बजेट विनियोजन गरिएको छ । प्रदेशको सञ्चार क्षेत्रको विकासका लागि प्रदेशको विज्ञापन प्रदेशस्थित सञ्चार क्षेत्रलाई उपलब्ध गराउन कानुन निर्माण गरिने बजेटमा व्यवस्था गरिएको छ । कर्मचारीलाई प्रोत्साहनका लागि विद्युतीय हाजिरीका आधारमा दैनिक २ सयका दरले खाजा खर्च दिने बजेटमा व्यवस्था गरेको बजेटमा उल्लेख छ ।
प्रदेश सांसद पूर्वाधार विकास कार्यक्रमका लागि १ अर्ब ५० करोड बजेट विनियोजन गरिएको छ । प्रदेश प्रमुख परशुराम खापुङले बजेटको अध्यादेश बिहीबार जारी गरेपछि कार्कीले सार्वजनिक गरेका हुन् । कोशी प्रदेश मन्त्रिपरिषद्को सिफारिसमा कोशी प्रदेश आर्थिक अध्यादेश र विनियोजन अध्यादेश २०८० प्रदेश प्रमुख खापुङले जारी गरेका छन् ।
