काठमाडौं, २२ असार । मन्त्री भागबन्डामा कुरा नमिलेपछि कोशी प्रदेश सरकार सुरुमै विवादमा परेको छ । कोशी प्रदेशका नव नियुक्त मुख्यमन्त्री उद्धव थापाले दुई मन्त्री नियुक्त गर्दै शपथ लिएका छन् । प्रदेश प्रमुख परशुराम खापुङ्गले मुख्यमन्त्री थापासहित, नेपाली कांग्रेसका प्रदीप सुनार र नेकपा एकिकृत समाजवादीका कमल जबेगुलाई पद तथा गोपनीयताको शपथ गराए । उनीहरूको मन्त्रालय भने तोकिएको छैन । मुख्यमन्त्रीसहित ४ जना मन्त्रीको शपथ गराउने तयारी भएपनि माओवादीले आन्तरिक विवादका कारण मन्त्री पठाएन । प्रधानमन्त्री पुष्पकमल दाहालका ज्वाँई जीवन आचार्यलाई पनि मन्त्री बनाउने तयारी भएकोमा अन्तिममा उनको शपथ रोकिएको छ । शपथ समारोहमा माओवादीका कुनै सांसदहरु उपस्थित देखिएनन् ।
उसो त, प्रदेश प्रमुख पर्शुराम खापुङ्ले संवैधानिक व्यवस्थाविपरित कांग्रेस नेता थापालाई मुख्यमन्त्री नियुक्त गरेको भन्दै चौतर्फी विरोध भइरहेका बीच सपथ ग्रहण गराउन लागिएको थियो । संविधानको धारा १६८ को उपधारा (२) अनुसार दुई वा दुईभन्दा बढी दलको समर्थनमा मुख्यमन्त्रीमा थापालाई प्रदेश प्रमुखले नियुक्त गरेका छन् । तर गठबन्धन दलले सभामुख बाबुराम गौतमलाई प्रदेससभा सदस्यको हैसियतमा हस्ताक्षर गराएर सरकार गठनका लागि बहुमत पुर्याउनु संवैधानिक व्यवस्था विपरित भएको भन्दै चोतर्फी आलोचना भइरहेको थियो । एमाले संसदीय दलले संवैधानिक व्यवस्था विपरित प्रदेश प्रमुखले मुख्यमन्त्रीमा थापालाई नियुक्त गरेको बिरूद्ध सर्वोच्च अदालतमा रीट दायर गरेर कानूनी उपचार खोज्ने तयारी गरेको छ । ९३ सदस्यीय प्रदेशसभामा गठबन्धन दल कांग्रेसका २९, माओवादी केन्द्रका सभामुखबाहेक १२, नेकपा एकिकृत समाजवादीका ४, जनता समाजवादी पार्टीको एक र प्रदेशसभा सदस्यको हैसियतमा सभामुख बाबुराम गौतम गरी बहुमत ४७ प्रदेश सांसदको समर्थन रहेको भन्दै थापाको नेतृत्वमा सरकार गठनका लागि दावी पेस गरेका थिए । एमालेका मुख्यमन्त्री हिक्मतकुमार कार्कीले एक मतको अभावमा विश्वासको मत नपाएपछि प्रदेश प्रमुख खापुङ्ले आइतबार सरकार गठनका लागि दावी पेस गर्न बिहीबार साँझ ५ बजेसम्मका लागि समय दिएका थिए ।
