काठमाडौं । काठमाडौंको गोकर्णेश्वर नगरपालिका वडा नं.३ स्थित राजाडिल सडक खण्ड मर्मत कार्यमा बालुवा डिपो सञ्चालक सुसान्त कुईकेलसहित चार जनाविरुद्ध भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगका प्रवक्ता नरहरि घिमिरेका अनुसार कुईकेलसहित सो सडक मर्मत तथा निर्माण उपभोक्ता समितिका पदाधिकारीहरु अध्यक्ष लक्ष्मण अधिकारी, सचिव प्रेमप्रसाद भण्डारी र सदस्य मोहन प्रसाद कुईकेलले सेवाग्राहीसँग एक लाख रुपियाँ घुस लिइसकेको अवस्थामा नियन्त्रणमा लिइएको थियो ।

गोकर्णेश्वर नगरपालिकासँग गरिएको सम्झौता विपरीत सो सडक निर्माण ठेक्का सम्पन्न गरी नगरपालिकाबाट रकम भुक्तानी लिइसकेपछि सेवाग्राहीले गरेको कामको भुक्तानी गर्ने शर्तमा उनीहरुले सो रकम लिएको आयोगको विज्ञप्तिमा उल्लेख छ ।

उनीहरुविरुद्ध भ्रष्टाचार निवारण ऐन, २०५९ बमोजिम बिगो रकम एक लाख रुपियाँ कायम गरी कैद र जरिवानाको मागदाबी लिइ विशेष अदालत काठमाडौंमा बिहीबार आरोपपत्र दायरि भएको आयोगले जनाएको छ ।