काठमाडौं । प्रतिनिधिसभाअन्तर्गतको पूर्वाधार विकास समितिका सभापति दीपक सिंहले नेपालका नदी तथा खोलाबाट गिट्टी, बालुवा र ढुंगा उत्खनन् कार्य खोल्न आवश्यक रहेको बताएका छन् । सोमबार काठमाडौंमा आयोजित एक कार्यक्रममा उनले यस्तो बताएका हुन् ।

उनले क्रसर उद्योग सञ्चालनका लागि आवश्यक गिट्टी, बालुवा र ढुंगाको उत्खनन् रोक्न नहुनेमा जोड दिए । नेपालका नदी तथा खोलाको गिट्टी, बालुवा र ढुंगा समयमै उत्खनन् नगरे भारत धनी हुने धारणा उनले राखे । उनले नदी तथा खोलाको गिट्टी, बालुवा उत्खनन् गरिए हजारौँलाई रोजगारी र राज्यलाई अर्बौँ रुपैयाँ आर्जन हुने विश्वास व्यक्त गरे । गिट्टी, बालुवा उत्खनन् गर्न नदिने र क्रसर उद्योगहरू पनि बन्द गरिए हजारौँ मानिस विदेश जानुपर्ने अवस्था आउने विषयमा सरकार सचेत हुन आवश्यक रहेको उनले औँल्याए । गिट्टी, बालुवा उत्खनन् नगरिँदा रोजगारी मात्र नभएर राज्यको राजस्व समेत गुम्ने खतरा रहेको उनको भनाइ छ ।

सरकारले गिट्टी, बालुवा र ढुंगा उत्खनन् गर्न दिएर अर्बौँ रकम आर्जन गर्दा ५० लाख रुपैयाँ खोला संरक्षणका लागि खर्च गर्नुपर्ने उनले उल्लेख गरे । यसरी काम गरे सरकारले प्रत्येक वर्ष अर्बौँ रुपैयाँ आर्जन र हजारौँ युवालाई मुलुकभित्रै रोजगारी दिन सक्ने उनले बताए । क्रसरको ठेक्का लिन मेयर, उपमेयरहरू नै अग्रसर रहेको भन्दै उनले यस्तो कार्य रोक्न आवश्यक रहेकामा जोड दिए ।

उनले आफ्नो कार्यकालमा कुनै बेइमानी नगर्ने प्रतिबद्धता जनाए । देशलाई ठग्ने काम नगर्न उनले क्रसर र टिपर व्यवसायीलाई आग्रह गरे । उनले सरकारका मुख्यसचिव र सचिवहरूले विदेशी कम्पनीहरूलाई खुसी बनाउनका लागि विभिन्न योजनाहरू हालिदिने गरेको आरोप लगाए । मुख्यसचिव र सचिवहरूलाई ‘रिटायर्ड’ भएपछि विदेशी कम्पनीमा पाँच वर्षसम्म काम गर्न नपाउने व्यवस्था गरे मात्र मुलुकलाई लयमा ल्याउन सकिने उनको भनाइ छ ।