काठमाडौं । गायक प्रकाश सपुतमाथि रोमानियामा आक्रमण भएको छ । गायक सपुतलाई कन्सर्टमा गीत गाइरहेकै अवस्थामा दर्शकदिर्घाबाट बियरको बोतलले प्रहार गरेको हो ।

घटनापछि कार्यक्रम केहिबेर बिथोलिएको थियो । केहि समयपछि पुनः गायक प्रकाशले प्रस्तुति दिएका थिए । बोतल प्रहार गर्ने व्यक्तिलाई नियन्त्रणमा लिएको आयोजकले बताए ।

सो घटनाप्रति राष्ट्रिय लोक तथा दोहोरीगीत प्रतिष्ठानले घोर भर्त्सना गरेको छ । अध्यक्ष रीता थापामगरले सोमबार विज्ञप्ति जारी गर्दै घटनालाई लिएर त्यहाँ स्थित कूटनीतिक नियोग र प्रतिष्ठानको युरोप शाखाको समेत ध्यानाकर्षण गराएको बताएकी छिन् । यस्ता घटनाले कलाकारको मनोबल गिर्नुको साथै नेपाली दाजुभाइबाट हुने यस्ता अवाञ्छित क्रियाकलापले सबै नेपाली कलाकारको मन दुखेको विज्ञप्तीमा उल्लेख छ ।