काठमाडौं । चालु आर्थिक वर्षको पहिलो महिना साउनमा शोधनान्तर स्थिति ३२ अर्ब ९० करोडले बचतमा देखिएको छ । जबकि गत वर्षको साउनको तुलनामा शोधनान्तर स्थिति १९ अर्ब ७६ करोड घाटामा रहेको थियो । मुलुकबाट बाहिरिने र मुलुकमा भित्रिने रकमको अन्तरलाई शोधनान्तर स्थितिले जनाउँछ ।
मुलुकबाट बाहिरिनेभन्दा भित्रिने रकम बढी हुँदा शोधनान्तर बचतमा जान्छ । नेपाल राष्ट्र बैंकले सार्वजनिक गरेको चालु आर्थिक वर्षको पहिलो महिनाको वित्तीय प्रतिवेदनअनुसार अमेरिकी डलरमा शोधनान्तर स्थिति २४ करोड ९५ लाख बचतमा देखिएको छ । शोधनान्तर स्थिति बचतमा जाँदा विदेशी मुद्रा सञ्चितिमा पनि सकारात्मक प्रभाव पर्दछ । साउन मसान्तसम्म १५ खर्ब ७३ अर्ब रुपैयाँ बराबर विदेशी मुद्रा सञ्चिति रहेको राष्ट्र बैंकले जनाएको छ ।
असार मसान्तसम्म यस्तो सञ्चिति १५ खर्ब ३९ अर्ब बराबर रहेकोमा साउनमा २.२ प्रतिशतले बढेको हो । अमेरिकी डलरमा मुलुकको सञ्चिति असार मसान्तसम्मको तुलनामा १.२ प्रतिशतले बढेर साउन मसान्तसम्म ११ अर्ब ८५ करोड पुगेको छ ।
कुल विदेशी विनिमय सञ्चितिमध्ये राष्ट्र बैंकमा रहेको सञ्चिति १३ खर्ब ८५ अर्ब रुपैयाँ बराबर छ भने बैंक तथा वित्तीय संस्था (नेपाल राष्ट्र बैंकबाहेक) सँग १ खर्ब ८७ अर्ब ८९ करोड रुपैयाँ बराबर छ । हालको विदेशी विनिमय सञ्चितिले अहिलेकै आयातलाई आधार मान्दा १२.५ महिनाको वस्तु र १०.३ महिनाको वस्तु तथा सेवा आयात धान्न पर्याप्त रहने राष्ट्र बैंकले जनाएको छ ।
