काठमाडौं, भदौ २४ । सशस्त्र प्रहरी कल्याणकारी सेवा केन्द्रमार्फत कास्कीको पोखरामा सञ्चालित कालिका फ्युल सेन्टरको हाताभित्र निर्माण गरिएको विद्युतीय सवारी साधन चार्जिङ स्टेसन उद्घाटन गरेको छ। सशस्त्र प्रहरी बलका महानिरीक्षक राजु अर्याल र नेपाल विद्युत प्राधिकरणका कार्यकारी निर्देशक कुलमान घिसिङले संयुक्त रूपमा आइतबार दुई अत्याधुनिक फास्ट चार्जिङ स्टेसनको उद्घाटन गरे हो। सार्वजनिक विद्युतीय सवारी साधन चार्जिङ स्टेसनमा छिटो चार्ज गर्न मिल्ने ६०,६० किलोबाटका डिसी र २२ किलोवाटका एसी चार्जरहरू राखिएका छन्। चार्जिङ स्टेसनमा १४२ किलोवाट क्षमताका दुई वटा फास्ट चार्जरहरू छन्। यसबाट ठूला बससहित ६ वटा सवारीसाधनले एकै पटक चार्ज गर्न सकिने छ।

सशस्त्र प्रहरी र प्राधिकरणबीच २०७९ भदौ ९ मा चार्जिङ स्टेसन स्थापनाका लागि समझदारी पत्रमा हस्ताक्षर भएको थियो। प्राधिकरणले आफ्नै खर्चमा चार्जिङ स्टेसनका सम्पूर्ण उपकरण खरिद तथा पूर्वाधार निर्माण गरेको हो। यसले व्यापार घाटा न्यूनीकरणमा समेत टेवा पुग्ने उल्लेख गरे। प्राधिकरणका कार्यकारी निर्देशक घिसिङले देशभित्र उत्पादित स्वच्छ हरित ऊर्जा यही खपत बढाउन विद्युतीय सवारी साधनको प्रयोगले सहयोग गर्ने बताएका छन्। यसकारण देशभर चार्जिङ स्टेसनको पूर्वाधार विस्तारका लागि आवश्यक गृहकार्य भइरहेको पनि बताएका छन्।

विद्युत खपत बढाउनका लागि उत्साहजनक चरणमा प्रवेश गरेको उल्लेख गर्दै घिसिङले भने, बिगतमा लोडसेडिङ हुँदा विद्युतीय सवारी साधनको कल्पना गर्न पनि सक्दैन थियौं, लोडसेडिङ अन्त्यपछि विद्युतीय सवारी साधनको प्रयोग बढेको छ, चार्जिङ पूर्वाधार कम हुने होकी भन्ने अवस्था सिर्जना भएको छ । बढी भएको विद्युत निर्यात गर्ने अवस्थामा पुगेको उनले उल्लेख गरे। प्राधिकरणले पहिलो चरणमा देशका विभिन्न स्थानमा निर्माण गरेको ५१ वटा विद्युतीय सवारी साधनको अत्याधुनिक फास्ट चार्जिङ स्टेसन स्थापना गरेको छ। दोस्रो चरणमा ११ वटा चार्जिङ स्टेसन निर्माण प्रक्रिया अगाडि बढेको छ।

प्राधिकरणको लगानी र एसियाली विकास बैंकको सहुलीयतपूर्ण ऋण तथा नर्वे सरकारको प्राविधिक सहयोगमा विद्युतीय सवारी चार्जिङ पूर्वाधार विकास आयोजनाअन्तर्गत सात प्रदेशका मुख्य राजमार्ग, बसपार्क र ठूला सहरहरूमा ५१ वटा विद्युतीय सवारी साधन छिट्टो चार्ज गर्न मिल्ने चार्जिङ स्टेसन सञ्चालित छन्। करिब ४० करोड रुपैयाँ लागतमा निर्माण गरिएका चार्जिङ स्टेसनमध्ये २६ वटामा ठूला बस, माइक्रो, ट्रक, पिकअप तथा कार र २५ वटामा सानारठूला कारहरू चार्ज गर्न मिल्ने भएका छन्।