काठमाडौं, भदौ १५। चालू आर्थिक वर्षको बजेट निर्माण गरिरहेको नेपाल नागरिक उड्डयन प्राधिकरणले कोभिडका कारण १६ अर्ब ४९ करोड रुपैयाँ आम्दानी गुमाएको बताएको छ । हरेक वर्ष १० प्रतिशतले आम्दानी वृद्धि गरिरहेको प्राधिकरण आर्थिक वर्षले २०७६,७७ देखि २०७९,८० सम्म १६ अर्ब ४९ करोड ७५ लाख रुपैयाँ आम्दानी गुमाएको हो ।

सबैभन्दा धेरै ०७७,७८ मा ७ अर्ब ७३ करोड, २०७८,७९ मा ४ अर्ब ३९ करोड, २०७६,७७ मा ३ अर्ब ४३ करोड र ०७९,८० मा ९२ करोड गरी प्राधिकरणले १६ अर्ब ४९ करोड आम्दानी गुमाएको हो ।२०७६ चैतमा सरकारले लकडाउन गरेपछि सुरु भएको नोक्सानी अझै पुरानो लयमा फर्किन नसकेको र यात्रु अनि उडान संख्या पनि अझै नबढेको प्राधिकरणले बताएको छ । प्राधिकरणले काठमाडौंसहित पोखरा, भैरहवामा तीन वटा अन्तर्राष्ट्रियसहित ३३ वटा विमानस्थल सञ्चालन गरिरहेको छ ।