काठमाडौं । नारायणगढ–मुग्लिन–नागढुङगा सडकखण्डमा आइतबारसम्मका लागि सवारी आवागमनमा रोक लगाइएको छ । जिल्ला प्रशासन कार्यालय चितवनले बिहीबारदेखि अविरल परेको वर्षाका कारण पहिरोको जोखिम अझै रहेको भन्दै सवारी साधना आवागमनमा रोक लगाएको हो । प्रशासकीय अधिकृत अन्तिम सिंजालीले शनिबार सूचना जारी गर्दै यस सडकखण्डमा सवारी साधन सञ्चालनमा पूर्ण रोक लगाइएको छ ।

पहिरोको जोखिम भएपछि यस सडकखण्डमा शुक्रबार साँझ ७ बजेदेखि बिहान ५ बजेसम्म पनि सवारी आवगमनमा रोक लगाइएको थियो । तर शनिबार बिहान ठाउँ–ठाउँमा पहिरो जाँदा यस सडकखण्ड पूर्णरुपमा सञ्चालनमा आउन सकेको छैन । पानी नरोकिएपछि सम्भावित क्षतिलाई कम गर्न जिल्ला प्रशासन कार्यालय चितवनले दिउँसो देखिनै सवारी साधन सञ्चालनमा पूर्ण रोक लगाएको हो ।

शनिबार बिहान मुग्लिन नागढुङगा सडक खण्डको मौवाखोला, घोप्टेभिर, नौ किलोलगायतका स्थानमा पहिरो जाँदा सडक अवरुद्ध भएको थियो । शुक्रबारदेखि रोकिएका सवारीसाधन र यात्रुहरू अलपत्र परेका छन् । पूर्व र पश्चिमबाट राजधानी जान लागेको सयौँ सवारी साधन नारायणगढको आपटार क्षेत्रमा रोकिएका छन् ।

भारी वर्षाको जोखिमले शुक्रबार साँझदेखि मुग्लिनको बाटो यातायात सञ्चालनमा रोक लगाएपछि सवारी साधन नारायणगढमा रोकिएको हो । मुग्लिन नारायणगढको आधा दर्जन स्थानमा पहिरो गएको छ भने केही स्थानमा सडक भासिएको छ । आपटारी, भरतपुरको वाइसपास सडक, भरतपुर बसपार्क लगायतका स्थानमा सवारी साधन रोकिएका छन् । अझै एक दिन सवारी सञ्चालन हुन नसक्ने भएपछि यात्रुहरू अलपत्र परेका छन् ।