हेटौडा । हेटौडा उपमहानगरपालिका, वडा नं १५ रातोमाटे चेकपोस्ट स्थित पूर्व पश्चिम सडक खण्डबाट शनिवार बिहान ३ बजे प्रहरीले आठ केजी सुनसहित दुई जना पक्राउ गरेको छ । दुई जना भारतीय नागरिक पक्राउमा परेको प्रहरीले जनाएको छ । पलैयाबाट हेटौडातर्फ आउँदै गरेको बागमती प्रदेश ०२—०४७ प ७५०३ नम्बरको स्कुटरबाट प्रहरीले करिब ११ करोड बराबरको सुन फेला परेको प्रहरीले जनाएको छ ।

भारत महाराष्ट्र राज्य सांगली जिल्ला दिघंची थाना पुजारवाडी बस्ने वर्ष २५ को अभिषेक अजिनाथ कुटी र सोही स्कुटरमा पछाडि सवार भारत महाराष्ट्र राज्य सांगली जिल्ला बस्ने वर्ष २७ को राहुल भिट्टिहाल बाडलाई सुनसहित पक्राउ गरेको प्रहरीले जनाएको छ । उनीहरुको शरीर तथा स्कुटर समेत खानतलासी गर्दा शरीरको विभिन्न भागमा लुकाई छिपाई राखी ल्याइएको अवस्थामा बिजक नभएको भन्सार छलिका सुन ल्याएको भन्दै बिस्कुटको आकारको ८ थान सुन तौल गर्दा ८ किलो २४३ ग्राम ९७० मिलिग्राम सुन बरामत भएको प्रहरीले जनाएको छ ।

आजको बजार भाउ अनुसार सुनको मूल्य ११ करोड ४३ लाख ५७ हजार ८७८ रुपैयाँ ६५० पैसा रहेको प्रहरीले जनाएको छ । सुन सहित निजहरू अभिषेक अजिनाथ कुटी र राहुल भिट्टिहाललाई नियन्त्रणमा लिई थप अनुसन्धान तथा कारबाहीको लागी राजश्व अनुसन्धान कार्यालय पथलैया बारा पठाउने तयारी भइरहेको प्रहरीले जनाएको छ ।