काठमाडौँ । कर्णाली प्रदेशअन्तर्गत जुम्लाको पातारासी गाउँपालिकामा नेपाल टेलिकमले मोबाइल सेवा विस्तार गरेको छ । पातारासी गाउँपालिका-२ मा नयाँ साइट निर्माण गरी २०८१ मङ्सीर १६ देखि टुजीरफोरजी मोबाइल सेवा सञ्चालन गरिएको टेलिकमले जनाएको छ ।

जिल्लाको अतिविकट पातारासी गाउँपालिकामा नेपाल टेलिकमले मोबाइल सेवा सञ्चालन गरेसँगै उक्त गाउँपालिकाका वडा नम्बर १, २ र ३ अन्तर्गतका गडीगाउँ, तल्फीगाउँ, माताचौरगाउँ, छुमचौरगाउँलगायत स्थानमा बसोबास गर्ने बासिन्दाहरू पहिलोपटक दूरसञ्चार सेवाबाट लाभान्वित भएका छन् ।

दूरदराजका क्षेत्रमा दूरसञ्चार सेवा पुऱ्याउने कार्यलाई उच्च प्राथमिकतामा राख्दै कम्पनीले उक्त स्थानका ग्राहकहरूको मागलाई लक्षित गरी भ्वाइस तथा डेटा सेवा विस्तार गरेको जनाएको छ ।

यससँगै यस भेगका स्थानीयवासी, घुम्न आउने पर्यटक तथा यस क्षेत्रका पर्यटनलगायत अन्य व्यवसायीहरूले आधुनिक दूरसञ्चार सेवाको प्रयोग गरी लाभ लिन सक्ने विश्वास कम्पनीको रहेको छ ।