काठमाडौं, असोज ४। अर्थमन्त्री महतले अर्थतन्त्र चलायमान बनाउनका लागि देखिएका समस्याहरु सरकारले हटाउँदै गएको बताएका छन् । निक्षेप तथा कर्जा सुरक्षा कोषको वार्षिकोत्सव कार्यक्रमलाई सम्बोधन गर्दै मन्त्री महतले अर्थतन्त्र चलायमान बनाउन स्रोत पनि अहिले जुटेकाले समस्या समाधान हुँदै जाने दाबी गरे ।

समस्या सम्बोधनका लागि सरकारले फेसिलेट गर्ने काममा कमी हुन दिने छैन, सरकारले समस्या हटाउँदै जानेछ, कतिपय हटिसकेका छन्’ उनले भने । हाल पर्यटक आगमन बढिरहेको, विदेशी मुद्रा सञ्चिति तथा विप्रेषण बढिरहेकाले अर्थतन्त्रमा स्रोतको उपलब्धता भए पनि चलायमान हुन नसकेको उनले स्वीकार गरे ।

हातमा परेको पैसा कहाँ के गर्ने भन्ने असुरक्षाका कुरा व्यापक प्रवाह भइरहेको छ । खत्तम छ अर्थतन्त्र, अहिले खर्च गर्न ठीक समय होइन, लगानी नगरौं, बैंकहरुले लगानी नगरुन्, पैसा थुपारुन् भन्ने जुन नकरात्मक सर्कुलर छ, त्यसलाई हामीले अन्त्य गर्नुपर्छ’ महतले भने । भएको स्रोत परिचालन गर्दा अर्थतन्त्र चलायमान हुने उनको भनाइ छ।

कोषले हाल ४ करोड १८ लाख निक्षेप खातामा रहेको १२ खर्ब ८८ अर्ब रकमको सुरक्षा प्रदान गरिरहेकोमा महतले प्रसंसा गरे । जुनसुकै लगानीमा पनि जोखिम हुने भएकाले त्यसलाई न्यूनीकरण गर्न कर्जा सुरक्षण कोषको भूमिका महत्त्वपूर्ण भएको उनले बताएका छन् ।