काठमाडौं । सत्तारुढ दल नेकपा एमालेले सरकारलाई दिएको समर्थन फिर्ता लिदै मन्त्रिपरिषदबाट बाहिरिएको छ । बुधबार अपरान्ह प्रधानमन्त्री पुष्पकमल दाहाल नेतृत्वको सरकारलाई दिएको समर्थन फिर्ता लिने निर्णय गरेको एमालेले सरकारमा सहभागी आठ जना मन्त्रीहरुलाई सामुहिक राजिनामा दिन लगाएको हो ।
उनिहरुले प्रधानमन्त्री दाहालसमक्ष राजीनामा बुझाएका छन् । चार महिनाअघि प्रमुख सत्ता साझेदारकारुपमा दाहाल नेतृत्वको सरकारमा सहभागी भएको एमाले अहिले आफ्नै नेतृत्वमा सरकार बनाउने तयारीसहित सरकारबाट बाहिरिएको छ ।
संसद्को दोस्रो ठुलो दल एमालेले पहिलो दल कांग्रेससँग मिलेर राष्ट्रिय सहमतिको सरकारको नेतृत्व गर्न लागेको हो । कांग्रेस र एमालेबीच सोमबार राति आलोपालो सरकारको नतृत्व गर्ने सहमति सहित गठबन्धन गर्ने सहमति भएको थियो ।
