काठमाडौँ । पछिल्लो समय सहकारी पीडितहरुको आन्दोलनलाई लक्षितगरि भूमि व्यवस्था, सहकारी तथा गरिबी निवारण मन्त्री बलराम अधिकारीले दिएको अभिव्यक्तीको चर्चा भइरहेको छ । बुधवार काठमाडौंमा सहकारी पत्रकार समाजको १४ औं स्थापना दिवस कार्यक्रममा बैंकबाट कम ब्याजमा रकम लिएर बढी ब्याज खान सहकारीमा पैसा राख्नेहरुले आन्दोलन गरिरहेको आरोप लगाएका थिए ।
उनले बढी ब्याज खान खोज्नेहरुले नै सहरकारी पीडितहरुको अगुवाई गरेर आन्दोलन गरिरहेको बताएका हुन । मन्त्री अधिकारीले सहकारी सबै खराब हुन् भनेर जनतालाई बुझाइएको भन्दै यसलाई चिर्न आवश्यक रहेको पनि बताए । उनले कसैले स्वार्थ पूरा गर्न लागेका सहकारी देखाएर सबै सहकारी नराम्रो हो भन्ने भाष्य बनाउन खोजिएको दाबी गरे। मन्त्री अधिकारीले सरकारले सहकारीका समस्या समाधानको लागि सहकारी अगुवा र पीडित जनताका सुझाव लिएर काम अघि बढाइरहेको बताए ।
उनले वार्तामा ८ बुँदे सहमति भएपछि ७ वटा बुँदामा एकहप्तामा काम सुरु गरेको बताए । एउटा बुँदामा काम गरेका छैनौं उनले भने, संसद्ले संसदीय समिति बनाएर छानविन गरिरहेको छ । समस्यामा आएका सहकारीका समस्या समाधानको लागि समस्याग्रस्त सहकारी समिति बनाएका छौं । छानविन समितिको सुझाव अनुसार सरकारले काम गर्छ ।
तर फेरि पनि आन्दोलन भइरहेको छ । किन रहेछ भन्दा मान्छेहरू बैंकबाट ऋण लिएर बढी ब्याज लिन र नाफा कमाउन सहकारीमा राख्नेहरू देखिएका छन् । मन्त्री अधिकारीले सहकारीका समस्या समाधान गर्न सरकारले पनि पहल गरिरहेको र पीडितहरूले पनि कानुन बमोजिम उपचार खोज्नुपर्ने बताए ।
