काठमाडौं । २०७२ सालको भूकम्पपछि ८ वर्षसम्म बन्द रहेको तातोपानी नाका सञ्चालनमा आएपछि व्यापारिक चहलपहल शुरु भएको छ । नेपाल–चीनको सीमा नाका मितेरी पुल लगायत बजार क्षेत्रमा नेपाल र चिनियाँ व्यापारीका साथै सर्वसाधारणको चहलपहल बढेको हो ।
भोटेकोशी गाउँपालिका–२ बाट चीन जोड्ने तातोपानी नाका भएर पछिल्लो पटक दुई सय स्थानीय चिनियाँ क्षेत्र प्रवेश गरेको कोदारीस्थित अध्यागमन कार्यालयका प्रमुख रवीन्द्र पोखरेलले बताए ।
आठ वर्षपछि पास प्रक्रिया पूरा गरेर जिल्लाका बासिन्दाले आवश्यक लत्ताकपडा र घरायसी सामग्रीलगायत खरिद गर्दै चिनियाँ बजार घुम्न पुगेका छन् । खासाबाट खरिद गरेर ल्याएका सामग्रीको भन्सार पासका लागि पुरानै भन्सारमा छोटी भन्सार राखिएको तातोपानी सुक्खा बन्दरगाहका प्रमुख भन्सार अधिकृत दयानन्द केसीले बताए ।
