काठमाडौं, भदौ १५। भारततर्र्फ नेपालको निर्यात घटेको छ । चालू आर्थिक वर्षको पहिलो महिनामा भारततर्फको निर्यात २०.८४ प्रतिशतले घटेको हो । व्यापार तथा निकासी प्रवद्र्धन केन्द्रका अनुसार साउन महिनामा नेपालले भारतमा ८ अर्ब ४८ करोड रुपैयाँ बराबरको वस्तु निर्यात गरेको छ । जुन गएको आवको साउन महिनाको तुलनामा १ अर्ब ६९ करोड रुपैयाँले कमी हो । खानेतेलको निर्यातमा उच्च ह्रास आएपछि भारतर्फको निकासी घटेको केन्द्रको विश्लेषण छ ।
‘भारततर्फको निकासीमा ह्रास आउनुमा भारततर्फ हुने खाद्य तेलहरू भटमास, पाम र सूर्यमुखी तेलको चार अर्ब ९४ करोडबराबरको ह्रास आउनु नै प्रमुख कारणका रूपमा रहेको छ, केन्द्रले उल्लेख गरेको छ । नेपालको कुल निकासीमा भारतको हिस्सासमेत घटेको छ । गएको आर्थिक वर्षको साउन महिनामा कुल निकासीमा भारतको हिस्सा ७२.३५ प्रतिशत रहेको थियो । चालू आवको साउन महिनामा यस्तो हिस्सा ६२.७० प्रतिशतले झरेको छ । भारततर्फको आयात भने ३.३० प्रतिशतले बढेको छ । चालू आवको साउनमा नेपालले भारतबाट ८१ अर्ब २५ करोड रुपैयाँ बराबरको वस्तु आयात गरेको छ । गत वर्ष उक्त महिनामा ७८ अर्ब ६६ करोडको वस्तु आयात भएको थियो ।
नेपालको निर्यात व्यापारका प्रमुख गन्तव्य मुलुकमा संयुक्त राज्य अमेरिका, जर्मनी, चीन, युके, फ्रान्स, जापान, युएई, अस्ट्रेलिया, नेदरलेन्ड्स, क्यानडा, टर्की, हङकङ चीन र इटाली रहेका छन् । यसमध्ये जर्मनी, जापान र इटलीतर्फको निर्यात घटेको छ । अन्य ११ मुलुकतर्फको निर्यात भने बढेको छ । पहिलो महिनामा चीनतर्फको निर्यात भने ह्वात्तै बढेको छ । केन्द्रका अनुसार साउन महिनामा अघिल्लो वर्षको सोही अवधिको तुलनामा चीनतर्फको निर्यात पाँच सय २७ प्रतिशतले बढेको हो ।
यो साउनमा नेपालले चीनमा ३९ करोडको निर्यात गरेको छ । जबकि, अघिल्लो वर्षको साउनमा ६ करोडको मात्रै निर्यात गर्न सकेको थियो । साउन महिनामा नेपालले कुल १३ अर्ब ५३ करोडको वस्तु निर्यात गरेको छ । जुन गत वर्षको साउनको तुलनामा २९.७ प्रतिशतले कमी हो । गत वर्षको साउनमा नेपालले २० अर्ब ७७ करोड निर्यात गरेको थियो ।
