काठमाडौँ । सत्तारुढ दल नेपाली कांग्रेसले उपसभामुख इन्दिरा रानाका विषयमा पछिल्लो समय उठेका विषयमा चासो राखेको छ । अमेरिकी दूतावासलाई पाँच जना व्यक्तिको भिसाको अन्तर्वार्ताको समय सारिदिन भन्दै लेखेको पत्रको विवादको छानबिन गर्नुपर्ने माग गरेको हो ।

कांग्रेस सांसद रामहरि खतिवडाले संसदमा बोल्दै उपसभामुखका विषयमा संसदीय छानबिन हुँदासम्म उपसभामुख राना संसद् बाहिर बसेर छानबिनमा सहयोग गर्नुपर्ने माग गरे । प्रतिनिधिसभाको आइतबारको बैठकमा सांसद खतिवडाले संसद्को उपसभामुखले चिठी लेखेको विषयमा छानबिन गर्नुपर्ने बताए ।

संसद्सँग कुनै साइनो नभएको पाँच जना मान्छे अमेरिकाका भिसाको अन्तर्वार्ताको लागि प्रयोग गरिएको पत्र प्राप्त भयो, यस्तो अवस्थामा उपसभामुखले संसद्को कमान्ड गर्न सुहाउँछ कि सुहाउँदैन प्रश्न गरे । संसद्बाट विदेश भ्रमणमा जानुपर्ने भए संसद् सचिवालयको आफ्नै प्रक्रिया हुनुपर्नेमा त्यसलाई मिचेर उपसभामुखले पत्र लेखेको खतिवडाको भनाइ थियो ।