काठमाडौं । कीर्तिपुर नगरपालिका स्थीत नगाउँमा रहेको दर्शन बचत तथा ऋण सहकारी संस्थाले पहिलो चरणको बचतफिर्ता गरेको छ । बागमती प्रदेश सहकारी रजिष्ट्रार कार्यालयमा सहकारीले बुझाएको बचत फिर्ताको विवरण अनुसार साना बचतकर्ताहरुको रकम फिर्ता गरिएको सहकारीका सिइओ सुवर्ण महर्जनले बताए ।

गत आइतबार शुक्रबारसम्म सहकारीले ५ सयदेखि ५ हजारसम्मका २ हजार ५ सय १० जना बचतकर्ताको ५० प्रतिशतका दरले रकम फिर्ता गरेको सिइओ महर्जनले बताए । केहि बचतकर्ताहरुको बाँकी रहेकाले सो रकम साउनको पहिलो साता वितरण गरिने सिइओ महर्जनको भनाई छ ।

उनले भने, ‘असार मसान्तबाट बचत फिर्ताको योजना बनाएका थियौं, तर बचतकर्ताहरुको आवश्यकताका आधारमा रकम फिर्ता गरेका हौं’। सहकारीले विभिन्न चरणमा बचतफिर्ता गर्दै सुन्यमा ल्याउने तयारी गरेको छ । दर्शन साकोसले साना बचतकर्ताहरुको रकम तीन स्थानबाट फिर्ता गरेको थियो । सहकारीको केन्द्रीय भवन कीर्तिपुर, अनामनगर र खुशिबुँ स्थीत सेवा केन्द्रबाट रकम वितरण गरेको हो । यता, बचतफिर्ताको माग गर्दै विभिन्न संघर्ष समिति बनाई सहकारीका विरुद्धमा आन्दोलन भइरहेका छन् ।

बचतकर्ता कञ्चन महर्जनको नेतृत्वमा बनेको संघर्ष समितिले तत्काल बचत फिर्ताको माग गर्दै विभिन्न चरणमा आन्दोलन गरेको थियो । भने, यता अनामनगरको आदिवासि सेवा केन्द्रका बचतकर्ताहरुले गुनु लामाको संयोजकत्वमा सहकारी पीडित सहजिकरण समिति बनाइँ बचत फिर्ताकालागि विभिन्न चरणमा धर्ना दिइरहेका छन् ।

सहकारी संस्थाका अध्यक्ष दिनेश दर्शनधारीले सञ्चालक समितिको चलअचल सम्पत्ती विक्रि गर्ने र कर्जा फिर्ताबाट प्राप्त हुने रकमले बचत फिर्ता गर्ने योजना अनुरुप नै अघि बढेको बताए । उनले भने, सायद दर्शन साकोस पहिलो सहकारी संस्था होला जसले यस्तो विषम परिस्थीतिमा पनि सम्पुर्ण बचतकर्ताको रकम फिर्ताकालागि सम्बन्धीत निकायमा कार्ययोजना सहित विवरण पेस गरेको छ । सोहि अनुरुप सहकारीले साना बचतकर्ताहरुलाई बचत फिर्तागरि खाता बन्द गरेको उनको भनाई छ । यता, बचतफिर्ता पाएका साना बचतकर्ताले आफुहरुले माया मारेको रकम फिर्ता पाएको बताए । उनिहरुले खुशी व्यक्त गर्दै भने, हामी साना बचत कर्ता हाम्रो बचतको लेखाजोखा नै भएको छैन होला भन्ने लागेको थियो । तर, हामीबाटै बचत फिर्ताको सुरुवात भयो, कर्मचारीले फोनै गरेर बचतफिर्ताकालागि बोलाउनुभयो ।

उनिहरुले निरन्तर सहकारी संस्था सञ्चालन भए थप बचत गर्ने मनसाय बनाएको बताए । तर, अधिकांस सहकारीमा बचत जोखिममा रहेको अबस्थामा दर्शनले बचतफिर्ता गर्दा थप उत्साहित भएको उनिहरुको भनाई छ । उनिहरुले भने,सहकारी विरुद्ध विभिन्न बहनामा आन्दोलन गर्नु भन्दा सहकारी सञ्चालकलाई काम गर्न दिइयो भने, रकम फिर्ता हुने रैछ । हामीले आन्दोलन गरेर होइन नियम अनुसार रकम फिर्ता पायौं हाम्रो सानो रकम पनि सहकारीले पहिलो प्राथमिकता दिएर वितरण गर्यो ।