काठमाडौं । राष्ट्रिय सहकारी बैंकका अध्यक्ष समेत रहेका आइडियल यमुना हाम्रो सहकारी संस्थाका अध्यक्ष केबी उप्रेती पक्राउ परेका छन् । बालाजुबाट बुधबार बिहान उनलाई पक्राउ गरिएको प्रहरीले जनाएको छ । उनलाई महाराजगञ्ज प्रहरीवृतमा राखिएको जिल्ला प्रहरी परिसर काठमाडौंले जनाएको छ । ३० हजारभन्दा बढी बचतकर्ताको ८ अर्ब रुपैयाँ बचत रहेको आइडियल यमुना हाम्रो सहकारी संस्था अध्यक्ष उप्रेती विरुद्ध बचत रकम हिनामिना गरेको जाहेरी परेको थियो ।
नेकपा एमालेको सहकारी तथा गरिबी निवारण विभाग सचिवसमेत रहेका उप्रेतीलाई बचतकर्ताको रकम हिनामिना गरेको आरोप लागेपछि पार्टीले जिम्मेवारीबाट हटाइएको थियो । यता, अध्यक्ष उप्रेतीलाई प्रहरीले पक्राउ गरेपछि उनको नेतृत्वमा रहेको सहकारी बैंक तथा सहकारी संस्थाको अबस्था के हुने भन्ने प्रश्न उब्जीएको छ ।
सहकारी अभियन्ता समेत रहेका उप्रेती जोडिएका अन्य वित्तीय संस्थाहरुमा समेत तरंग फैलिएको छ। विशेषगरि उनको नेतृत्वमा रहेको सहकारी बैंक त्यहाँको वित्तीय प्रणालीमा थप समस्या आउने सहकारी अभियन्ताहरुको भनाई छ ।
देशैभरिका सहकारीहरुको साझा संस्थाकारुपमा रहेको सहकारी बैंककै नेतृत्व प्रहरी हिरासतमा हुँदा देशका सहकारी संस्थाहरुमा थप आर्थिक समस्या बढ्ने आकलन गरिएको छ । त्यस्तै, सहकारी बैंकबाट अध्यक्षको सहकारीमा ठुलो रकम ऋण प्रवाह भएकाले सहकारी बैंककै अबस्था के हुने भन्ने ठुलो आशंका बढेको छ । उनको सहकारीमा योजना विनै सहकारी बैंकले लगानी गरेको कतिपय संस्थाहरुले आरोप समेत लगाएका थिए ।
