काठमाडौं, भदौ १ । नेपाल सरकारले तिर्न बाँकी ऋण २२ खर्ब १८ अर्ब ५४ करोड रुपैयाँ पुगेको छ । राष्ट्र बैंकले सार्वजनिक गरेको गत आर्थिक वर्षको वित्तीय प्रतिवेदन अनुसार असार मसान्तसम्म सरकारको आन्तरिक र वाहृय ऋण २२ खर्ब १८ अर्ब ५४ करोड रुपैयाँ पुगेको हो ।
सरकारको वाहृय ऋण रकम १० खर्ब ९३ अर्ब ३५ करोड र आन्तरिक ऋण ११ खर्ब २५ अर्ब १९ करोड रुपैयाँ बराबर छ । सरकारको कुल ऋण एक वर्षको अवधिमा २ खर्ब ८ अर्ब बढेको हो । २०७९ असार महिनासम्म सरकारको कुल ऋण रकम २० खर्ब १० अर्ब १३ करोड रुपैयाँ थियो । कुल गार्हस्थ्य उत्पादनमा सरकारको ऋण अनुपात ४१.२ प्रतिशत पुगेको छ । २०७९ असार मसान्तसम्म यस्तो अनुपात ४०.७ प्रतिशत हो ।
