काठमाडौं, भदौ १८। पोखराका चोकहरू अब रातमा पनि उज्याला हुने भएका छन्। पोखराका २३ वटा मुख्य चोकमा आधुनिक प्रविधिजडित हाइमास्ट लाइट जडान गरिएको छ। यिनमा आवश्यकताअनुसार कम र बढी उज्यालो दिन सक्ने प्रविधि पनि जडान गरिएको हाइमास्ट लाइट जडान आयोजनाका प्रमुख प्रमोद रिजालले बताए । रिजालका अनुसार बत्ती बिग्रिएको वा नबलेको जानकारी मोबाइलमा आउनेछ। त्यसैले तत्काल मर्मतसम्भार गर्न मद्दत हुनेछ।६ मिटर अग्लो पोलमा बल्ने यी बत्तीले अहिले सडकमा भएको सामान्य बत्तीले भन्दा धेरै उज्यालो दिन्छ।

बल्ब ५० हजार घन्टा निरन्तर बल्न सक्ने, पाँच वर्षको ग्यारेन्टी कम्पनीले दिएको छ, रिजालले भने, हामीले फिलिप्स कम्पनीको हाइमास्ट लाइट भारतबाट ल्याएर जडान गरेका हौं। बत्ती बिग्रिँदा वा मर्मतका लागि ठेकेदार कम्पनीले ५ वर्षसम्म हेर्ने गरी सम्झौता गरिएको छ। लाइट आफैं बल्ने र निभ्ने बनाउन स्वचालित प्रणाली जडान गरिएको छ। सूर्योदय र सूर्यास्तको समय मिलाएर उक्त प्रणाली राखेको उनले बताएका छन्। सूपोखरा महानगरका पूर्व मेयर मानबहादुर जिसीले उक्त बत्ती जडान गर्न नेपाल विद्युत प्राधिकरणसँग सम्झौता गरेका थिए। प्राधिकरण र पोखरा महानगरको आधा आधा लगानीमा बत्ती जडान गरिएको हो। लाइट राख्न चार सय ३९ वटा नयाँ पोल गाडिएका छन्। २३ मुख्य चोकमा राखिएका यी बत्तीले ६० किलोमिटर क्षेत्रमा उज्यालो दिने रिजालले बताएका छन्।

कुल २ हजार ७ वटा बल्ब छन्। यसको लागत १४ करोड ६५ लाख रूपैयाँ छ। बत्ती जडानको ठेक्का लिएको टपसन इनर्जी प्रालिका निर्देशक किरण गौतमले सम्झौताअनुसार आगामी पाँच वर्ष मर्मतसम्भारको काम गर्ने प्रतिबद्धता बताए। पोखरामा धेरै पानी र चट्याङ पर्ने भएकाले बिग्रिने सम्भावना अत्यधिक रहेको भन्दै उनले तत्काल मर्मतसम्भार गर्न आफ्नो कम्पनी अग्रसर भएको बताए। बत्ती जडान सकिएपछि प्राधिकरणका निर्देशक कुलमान घिसिङले स्थानीय व्यवस्थापनको जिम्मा पोखरा महानगरलाई हस्तान्तरण गरेका छन्। यत्तिले मात्र उज्यालो पोखरा बनाउने अभियान पूरा हुँदैन, उनले भने, अरू ठाउँमा पनि यस्तै बत्ती राख्न प्राधिकरणसँग सम्झौता चरणमा छौं।

पोखरा महानगर ललितपुरभन्दा १४ गुणा र काठमाडौं भन्दा १० गुणा ठूलो रहेको भन्दै उनले ठूलो भूगोललाई उज्यालो राख्नु चुनौतीपूर्ण रहेको बताए। प्राधिकरणका कार्यकारी निर्देशक कुलमान घिसिङले ललितपुर उपमहानगरबाट देशका सबै सहरमा उज्यालो अभियान चलाएको बताए। ललितपुरका मेयर चिरिबाबु महर्जनले बजेट विनियोजन गरेर स्मार्ट सडक बत्ती राख्न अनुरोध गरेको र त्यसपछि प्राधिकरणले उज्यालो सहरको कार्यक्रम ल्याएको उनले जानकारी दिए।ललितपुरले आफ्नै खर्चमा यस्तो लाइट राखेको थियो।

त्यसपछि प्राधिकरणको बोर्डले स्थानीय तहसँग मिलेर उज्यालो सहर कार्यक्रम ल्यायो उनले भने, अहिले हामी गाउँपालिकासँग पनि साझेदारीमा यो कार्यक्रम गरेका छौं, देशभर सफल भइराखेको छ। प्राधिकरणले लोडसेडिङ अन्त्य घोषणा गर्दा ग्रामीण भेगमा बिजुली नै नपुगेको भन्दै उनले अहिले देशको ९८ प्रतिशत घर विद्युतीकरण भइसकेको बताए। अब छिट्टै शतप्रतिशत नेपालीका घरमा बिजुली पुर्‍याउने योजना रहेको उनले बताएका छन्।