काठमाडौँ। विपत् व्यवस्थापन क्षेत्रमा क्रियाशील व्यवसायीहरू नेसनल बिजनेस इनिसिएटिभ्स अर्थात् एनबिआई बिजनेस रेजिलेन्स अवार्डबाट सम्मानित भएका छन् । सम्मानित हुनेमा बहुराष्ट्रिय कम्पनी विधामा एनसेल र बोटलर्स नेपाल (तराई) छन् ।
त्यसैगरी, ठूला उद्योग विधामा पञ्चकन्या स्टिल तथा नेपाल डिस्टिलरिज, मझौला उद्योग विधाअन्तर्गत नेपाल डेरी प्रालि र कञ्चनजंघा टी स्टेट एन्ड रिसर्चका साथै सूक्ष्म, घरेलु तथा साना उद्योग विधामा महागुठी र नेपाल नटक्राफ्ट सेन्टर पनि एनबिआई बिजनेस रेजिलेन्स अवार्डबाट सम्मानित भएका हुन् ।
उक्त सम्मान विपत् व्यवस्थापन, जोखिम न्यूनीकरण तथा व्यवसाय निरन्तरता व्यवस्थापनमा पुर्याएको योगदानस्वरूप प्रदान गरिएको एनबिआईले जनाएको छ । कार्यक्रममा उद्घाटन उद्योग, वाणिज्य तथा आपूर्ति मन्त्रालयका सचिव कृष्णबहादुर राउतले निजी क्षेत्रबाट भएको यो कार्य प्रशंसनीय भएको बताए ।
विपत् व्यवस्थापनमा थप सजग बनाई देशभित्र र बाहिर गरिँदै आएका सफल प्रयास, चुनौती र सिकाइ आदानप्रदान गर्न कार्यक्रम आयोजना गरिएको एनबिआईका अध्यक्ष कुशकुमार जोशीले बताए ।
