काठमाडौं । नेपाल सरकारले विकास ऋणपत्र मार्फत् १० अर्ब आन्तरिक ऋण उठाउने भएको छ । ५ भदौ शुक्रबार ५ वर्षका लागि विकास ऋणपत्र बोकबोल मार्फत् १० अर्ब आन्तरिक ऋण उठाउने तयारी भएको हो । विकास ऋणपत्र २०८५ ‘ञ’ नाम दिइएको उक्त ऋणपत्रको ब्याजदर बोलकबोलबाट तय हुने नेपाल राष्ट्र बैंकले जनाएको छ । ऋणपत्रको अवधि ५ वर्षको रहेको छ ।

बोलवालाले कबोल गरेको ब्याजदरलाई सानोदेखि ठूलो क्रममा मिलाएर राखी बाँडफाँट गरिने रकमसम्ममा कायम भएको ‘कट अफ’ ब्याजदरलाई एकल ब्याजदर कायम हुने राष्ट्र बैंकले जनाएको छ । उक्त ब्याजदर र त्यसभन्दा तलका सबै बोलवालाहरुलाई सोही एकल ब्याजदरमा ऋणपत्र उपलब्ध हुनेछ । ऋणपत्रमा बैंक तथा वित्तीय संस्था, गैर–बैंक वित्तीय संस्था, बीमा कम्पनी, संगठित संस्था तथा नेपाली नागरिकले बोलकबोल पेस गर्न सक्नेछन् । ऋणपत्र धितो राखी कर्जा लिन र दिन पाइनेछ ।

ऋणपत्रको ब्याजदर अर्ध वार्षिक रुपमा भुक्तानी हुनेछ भने र आर्जित ब्याजमा ब्याजकर लाग्नेछ । ऋणपत्र प्रतिस्पर्धी र अप्रतिस्पर्धी बोलवालाहरुलाई क्रमशः निष्कासित रकमको ८५ र १५ प्रतिशतले हुने ८ अर्ब ५० करोड रुपैयाँ र १ अर्ब ५० करोड रुपैयाँ छुट्याइएको छ । ऋणपत्रमा घटीमा ५० हजार र बढीमा कुल निष्कासित रकमको सीमामा नबढाइ ५० हजारले भाग गर्दा निःशेष भाग जाने अंकमा बोलकबोल पेश गर्नुपर्नेछ ।

ऋणपत्र खरिदका लागि व्यक्ति तथा संस्थाले बोलकबोल प्रक्रियाअन्तर्गत प्रतिस्पर्धी वा अप्रतिस्पर्धी कुनै एक बोलवालाको रुपमा मात्र भाग लिन सक्नेछन् । नेपाल राष्ट्र बैंकबाट इजाजतपत्र प्राप्त वाणिज्य बैंक, विकास बैंक र वित्त कम्पनीले अप्रतिस्पर्धीको रुपमा भाग लिन पाउने छैनन् ।

सरकारले चालू आर्थिक वर्षमा २ खर्ब ४० अर्ब आन्तरिक ऋण उठाउने लक्ष्य लिएको थियो । चालु आर्थिक वर्ष लागेपछि विकास ऋणपत्र मार्फत् ४९ अर्ब २१ करोड आन्तरिक ऋण उठाइसकेको छ । ७ प्रतिशतलाई कट अफ ब्याजदर कायम गर्दै ७ प्रतिशत भन्दा कम ब्याजदरमा ऋणपत्र बोलकबोल पेश गर्नेको मात्रै आन्तरिक ऋण उठाइरहेको छ । यस्तै, ट्रेजरी बिल मार्फत् ५ अर्ब गरी ५४ अर्ब २१ करोड आन्तरिक ऋण उठाइसकेको सरकारले शुक्रबार थप १० अर्बको विकास ऋणपत्र बोलकबोल गर्ने भएको हो ।

चालु आर्थिक वर्षको पहिलो र दोस्रो त्रैमासमा १ खर्ब १० अर्ब आन्तरिक ऋण बोलकबोल गर्ने तालिका प्रकाशित गरेकोमा असोजको सुरुमा नै करिब आधा आन्तरिक ऋण उठाइसकेको छ ।