काठमाडौं । सरकारले विलासिता सामग्रीमा कर लगाएका छन् । अर्थमन्त्री डा.प्रकाशशरण महतले सरकारले विलासिता शुल्कको शिर्षक दिएर कर संकलन गर्ने नयाँ बाटो खोजेका हुन् ।

अब नेपालमा उपभोग हुने देहायका विलासिताका वस्तु तथा सेवाको खरिद रकममा दुई प्रतिशतका दरले विलासिता शुल्क लगाई असुल गरिनेछ, जसमध्ये–
(क) पाँच तारे र सो भन्दा माथिका तारे होटल तथा लक्जरी रिसोर्टले प्रदान गर्ने सेवा ।
(ख) आयातित मदिरासेवन ।
(ग) दश लाख रूपैयाँभन्दा बढी बहुमूल्य धातुका गरगहना हिरा, मोती, पत्थर जडित सुन आदि ।

सरकारले पाँच तारे र सो भन्दा माथिका होटल तथा लक्जरी रिसोर्टले प्रदान गरिने सेवाहरुमा, आयातित मदिरामा पैठारी हुने भन्सार बिन्दुमा पैठारीका बखत र दश लाख रूपैयाँभन्दा बढी मूल्यका हिरा, मोती, पत्थर जडित सुन वा बहुमूल्य धातुका गरगहना बिक्रीका अवस्थामा बिक्रेताले कर तिर्नुपर्ने व्यवस्था मिलाएको छ ।

यदि कुनै व्यक्तिले विलासिता शुल्क बापतको रकम दाखिल नगरेमा वार्षिक पन्ध्र प्रतिशतका दरले ब्याज लगाई असुल गरिने भनिएको छ । विलासिता शुल्क बापतको रकम असुल नगरेमा सो रकमको पच्चीस प्रतिशतसम्म शुल्क लाग्ने समेत व्यवस्था मिलाएको छ ।

विलासिता शुल्क बापत सङ्कलन गरेको रकम अर्को महिनाको २५ गतेभित्र राजस्व खातामा जम्मा गरी सोको विवरण सहितको जानकारी सम्बन्धित राजस्व कार्यालयमा पठाउनु पर्नेछ ।