काठमाडौं । उपप्रधान तथा अर्थमन्त्री विष्णु पौडेलले बैंकहरु डुब्ने खतरा बढेको भन्ने विषय गलत भएको बताएका छन् । उनले बैंकको लगानीमा सुधार भइरहेको भन्दै बैंक डुबे, अर्थतन्त्र समस्यामा छ भनेर प्रचार गरिएको बताए ।
आइतबार अर्थ मन्त्रालयमा आयोजना गरिएको पत्रकार सम्मेलनमा अर्थमन्त्री पौडेले यस्तो बताएका हुन् । अर्थमन्त्री पौडेलले बैंकको कर्जा प्रवाह बढिरहेको र निक्षेप जसरी नै कर्जा विस्तार पनि विस्तारै भैरहेको बताए ।
उनले यस्ता नकारात्मक प्रचारले स्थान पाउनु हुदैन भने । उनले बैंक र अर्थतन्त्र डुब्दैनन । न अर्थतन्त्र धराशायी छ न त बैंक नै डुबेका छन् । हावादारी प्रचार गर्न हुँदैन । एकाध समस्या हुन सक्छन तर त्यसको समाधान गर्न सकिन्छ । केही समस्या आयो भन्दैमा हामीले डुब्यो भन्दै प्रचार गर्न हुदैन । उनले सरकारमा आउँदा ओरालो लागिरहेको अर्थतन्त्रलाई सुधार गरिरहेको दावी गरे ।
