काठमाडौं, २६ असार । चिनियाँ सरकारले फाइनान्सियल टेक्नोलोजी कम्पनी एन्ट ग्रुपमाथि ९८ करोड ५० लाख डलर जरिवाना लगाएको छ ।
चिनियाँ खर्बपति तथा अलिबाबाका संस्थापक अध्यक्ष ज्याक माको एन्ट र यसका सहायक कम्पनीमाथि चिनियाँ सरकारले करिब १ अर्ब डलर जरिवाना लगाएको हो ।
योसँगै चीन सरकारले कम्पनीलाई यसको क्राउड फन्डिङ प्लेटफर्म सियाङहुबाओ बन्द गर्न आदेश समेत दिएको छ । चिनियाँ अधिकारीहरुले अब टेक कम्पनीहरुमाथिको नियन्त्रणमा छुट दिने तयारी गरिरहेको बताएका छन्। सन् २०२० मा चिनियाँ सरकारले एन्ट ग्रुपमाथि कारबाही सुरु गरेको थियो । जसमा यसको सहायक कम्पनी अलिबाबालाई २.८ अर्ब डलरको एन्टी–ट्रस्ट जरिवाना लगाइएको थियो ।
विश्वको सबैभन्दा ठूलो फाइनान्सियल टेक्नोलोजी कम्पनी एन्ट २०१४ मा स्थापित भएको थियो । चिनियाँ नियामकले नोभेम्बर २०२० मा एन्टको आईपीओलाई रोकेको थियो । यो विश्वको सबैभन्दा ठूलो आईपीओ थियो । हङकङ र सांघाई बजारका लगानीकर्ताबाट करिब ३४ अर्ब डलर जुटाएको थियो ।
एन्ट ग्रुपका संस्थापक ज्याक माले २०२० मा चिनियाँ नियामकहरुको आलोचना गरेका थिए । त्यसयता चीन सरकारले उनका कम्पनीविरुद्ध कारबाही गरिरहेको छ । यसबीच ज्याक मा लामो समयसम्म गायब भएका थिए ।
चिनियाँ सरकारको आलोचना गर्दा यसअघि पनि धेरै व्यापारी बेपत्ता भएका थिए ।
