काठमाडौं । पछिल्लो समय तयारीका विभिन्न स्थानमा गोली काण्डका घटना बढेका छन् । गएराति धनुषाको सीमावर्ती गाउँपालिका मुखियापट्टि मुसहरनिया वडा नम्बर २ स्थित दशगजा क्षेत्रमा गोली प्रहार गरी एक महिलाको हत्या गरिएको छ ।

शनिवार राति करिब ८ बजे अज्ञात समूहले महिलामाथि दुई राउण्ड गोली प्रहार भएको थियो । गोली लागेर घटनास्थलमै मृत्यु भएको महिलाको पहिचान खुल्न सकेको छैन । धनुषाका प्रहरी प्रमुख एसपी विश्वराज खड्काले घटनास्थल भारतीय भूमि परेकाले मृतक महिलाको शव भारतीय प्रहरीले नै लगेको जानकारी दिए ।

प्रहरीले मृत्यु हुने महिला भारतीय नै रहेको अनुमान छ । गोली हानेर हत्या गरेका समूह पनि भारत तीरै भागेको प्रहरीले बताएको छ । यसअघि शुक्रबार साँझ सुनसरीको धरान–तरहरा सडक खण्डको सेउती पुलमा गोली प्रहार गरी एक जनाको हत्या गरिएको थियो । लुटेरा समूहको गोली प्रहारबाट घाइते भएका विराटनगरका रोहित चौधरीको मृत्यु भएको सुनसरी प्रहरी प्रमुख प्रहरी उपरीक्षक प्रभूप्रसाद ढकालले जानकारी दिए ।