कैलाली । कैलालीको टीकापुर–३ शंकरपुरस्थित केदारेश्वर आधारभूत विद्यालयमा तोडफोड हुँदा करिब ३० हजारको क्षति भएको छ ।
शनिबार राति अज्ञात समूहले तीन वटा कक्षा कोठाको ढोका फोडेर डेस्क–बेन्च तोडफोड गरेका हुन् ।
विद्यालयका प्रधानाध्यापक बद्री भट्टराईका अनुसार तीन कोठाका १० थान डेस्क–बेच्न र झ्याल–ढोकामा तोडफोड गरिएको छ । तोडफोडबाट करिब ३० हजार बराबरको क्षति पुगेको उनले बताए ।
आफू प्रअ भएर आइसकेपछि यो चौथो पटक विद्यालयमा तोडफोड भएको उनको भनाइ छ । यसअघि अफिस रुममै तोडफोड भएको उनले बताए । ’यसअघि अफिसकै सामान चोरी भएको थियो । ३५ सय रुपैयाँ, भान्सामा भएका खाजाका सामान, बाल कल्याण संघले दिएको एक सय चक्की साबुन चोरी भएको थियो’, उनले भने । दोषीलाई पक्राउ गरेर कडाभन्दा कडा कारबाही गर्न उनले माग गरेका छन् ।
