एजेन्सी । अमेरिकी राष्ट्रपति डोनाल्ड ट्रम्पले इरानले अमेरिकासँगको आणविक सम्झौताका शर्तहरूमा एक प्रकारको सहमति जनाएको बताए । आइतवार समाप्त भएको दुई देशबीचको पछिल्लो वार्तालाई ट्रम्पले दीर्घकालीन शान्तिका लागि धेरै गम्भीर वार्ताका रूपमा वर्णन गरेको बीबीसीले जनाएको छ ।
यसअघि इरानका सर्वोच्च नेताका एक सल्लाहकारले एनबीसी न्यूजलाई बताएअनुसार इरान प्रतिबन्धहरू हटाउने बदलामा आफ्नो आणविक कार्यक्रममा छुट दिन इच्छुक रहेको छ । अमेरिकाले इरानलाई आणविक हतियार विकास गर्नबाट रोक्नका लागि युरेनियम सम्वर्द्धन बन्द गर्नेमा जोड दिएको छ । यद्यपि इरानले आफ्नो आणविक गतिविधिहरू पूर्णतया शान्तिपूर्ण रहेको दाबी गर्दै आएको छ ।
आफ्नो खाडी भ्रमणको दोस्रो गन्तव्य कतारमा आज व्यापारिक नेताहरूसँग बोल्दै ट्रम्पले इरानको आणविक कार्यक्रममा सम्झौता नजिक पुगेको र तेहरानका स्थलहरूमा सैन्य हमलाबाट बच्न सकिने सुझाव दिए ।
ट्रम्प सन् २०१८ मा इरान र अन्य पाँच विश्व शक्तिहरूबीच भएको अघिल्लो आणविक सम्झौताबाट बाहिरिएका थिए । उनले पहिले नै अप्रिलमा शुरू भएको नयाँ वार्ता सफल नभए इरानको आणविक सुविधाहरूविरुद्ध सम्भावित सैन्य कारबाहीको चेतावनी दिए । एक वरिष्ठ अमेरिकी अधिकारीले प्राविधिक तत्त्वहरूमार्फत काम जारी राख्न वार्ता अगाडि बढाउने सहमति भएको बताए ।
