काठमाडौं, २५ असार । प्रमुख शीर्ष नेताहरुबीच संसद्को अवरोध खोल्ने विषयमा सहमति भए पछि संसद सचिवालयले आजको कार्यतालिका सार्वजनिक गरेको छ ।
सिंहदरबार स्थित प्रधानमन्त्रीको कार्यालयमा प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा र प्रमुख प्रतिपक्ष दल नेकपा एमालेका अध्यक्ष केपी शर्मा ओलीबीच संसद खुलाउने विषयमा सहमति भएको प्रधानमन्त्री दाहालको सचिवालयले जनाएको छ ।
यसअघि हिजो पनि प्रतिनिधिसभाको बैठकको अवरोध खुलाउनेबारेमा तीन दलका शीर्ष नेताहरुबीच सहमति भए पनि अन्तिममा भाँडिएको थियो । हिजोको छलफलमा प्रधानमन्त्री दाहालले असार १८ गते एक कार्यक्रममा दिएको अभिव्यक्तिबारे संसदमा जवाफ दिने र संसद अगाडि बढाउने सहमति भएको छ । प्रतिनिधिसभाको बैठक ३ बजे बोलाइएको छ ।
