काठमाडौं। तीन महीना अवधिमा होटल तथा पर्यटन समूहका लगानीकर्ताले सर्वाधिक कमाएका छन् । यस समूहको परिसूचक गत फागुन २५ गते ३ हजार १ सय ३० दशमलव ३४ विन्दुमा रहेकोमा जेठ २५ गते ४ हजार १३९ दशमलव ८६ विन्दुमा पुगेको हो ।
यस आधारमा यस समूहको परिसूचक ३२ दशमलव २५ प्रतिशत बढेको छ । गत फागुन २५ गते नेप्से परिसूचक २ हजार २ दशमलव ७० विन्दुमा थियो । जेठ २५ गते बिहीवार नेप्से परिसूचक १ हजार ९३९ दशमलव ६१ विन्दुमा रहेको छ । यसरी घटेको बजारमा पनि होटल तथा पर्यटन समूहका शेयरमा लगानीकर्ताको आकर्षण देखिन्छ । पर्यटकको आगमनमा भएको वृद्धिसँगै यस समूहका कम्पनीहरूको नाफामा वृद्धि भएको हो । यसको प्रत्यक्ष असर कम्पनीको शेयर मूल्यमा परेको छ ।
दोस्रोमा निर्जीवन बीमा समूहको परिसूचक १४ दशमलव २२ प्रतिशत बढेको छ । तेस्रोमा व्यापारिक समूहको परिसूचक १३ दशमलव ८४ प्रतिशत वृद्धि भएको छ ।
त्यस्तै यो तीन महीना अवधिमा सबैभन्दा बढी बैंकिङ समूहका शेयरधनीले गुमाएका छन् । यस समूहको परिसूचक ८ दशमलव ५० प्रतिशत घटेको छ । त्यस्तै दोस्रोमा ‘अन्य’ समूहको परिसूचक ६ दशमलव शून्य ७ प्रतिशत घटेको छ । त्यसपछि लघुवित्त समूहको परिसूचक ५ दशमलव ६२ प्रतिशत घटेको छ ।
