काठमाडौं । कारोबारको दोस्रो दिन सेयर बजारको परिसूचक नेप्से २ हजार नाघेर फर्किएको छ । अघिल्लो दिनको तुलनामा नेप्से ७.७ अंक बढेर १९८७ अंकमा कायम भएको हो । कारोबार सुरु भएको ११ मिनेटमै नेप्से २००२ अंकसम्म पुगेको थियो । त्यसपछि भने उतारचढावका बीच अन्तिममा १९८७ अंकमा कायम भएको छ ।

परिसूचक सामान्य बढ्दा कारोबार रकम भने अघिल्लो तुलनामा केही घटेको छ । आइतबार ३ अर्ब ४५ करोड रुपैयाँ बराबरको धितोपत्र कारोबार भएकोमा सोमबार २ अर्ब ८८ करोडमा खुम्चियो । कुल ८९ कम्पनीको मूल्य बढ्दा १२६ को घट्यो भने ८ को स्थिर रह्यो ।

जसमध्ये बैंकिङ ३, होटल तथा पर्यटन ४५१, जीवन बीमा ७, उत्पादन १०२, माइक्रोफाइनान्स १५ र अन्य उपसमूह ०.६ अंक बढे । विकास बैंक १८, फाइनान्स १६, जलविद्युत् ७, निर्जीवन बीमा ५, र ब्यापार उपसमूह ३ अंक घटे । प्रतिशतका आधारमा होटल तथा पर्यटन उपसमूह सबैभन्दा धेरै १० प्रतिशत बढ्यो ।

अभियान लघुवित्त, कालिन्चोक दर्शन, भूगोल इनर्जी, सिटी होटल र चन्द्रागिरि हिल्सको मूल्य सबैभन्दा धेरै १० प्रतिशत बढ्यो । कारोबार रकमका आधारमा सोल्टी होटल, हिमालयन डिस्टिलरी, शिवश्री हाइड्रोपावर, नागरिक लगानी कोष, आईजीआई प्रुडेन्सियल इन्स्योरेन्स कम्पनी क्रमशः अगाडि रहेको छ ।