काठमाडौं । राष्ट्रिय मानव अधिकार आयोगले काठमाडौंको तीनकुनेमा राजतन्त्र समर्थकहरुद्वारा भएको प्रदर्शन र आमसभाका क्रममा हिंसात्मक कार्यमा संलग्नलाई कारवाही गर्न सरकारलाई आग्रह गरेको छ । आयोगले प्रेस विज्ञप्ती गर्दै काठमाडौंको तीनकुनेमा अनुगमनका क्रममा आमसभा हिंसात्मक हुन पुगेको जनाएको छ ।
प्रदर्शनकारी तीनकुनेबाट प्रहरीको घेरा तोडी निषेधित क्षेत्र नयाँवानेश्वरतर्फ प्रवेश गर्न खोज्दा प्रदर्शनकारी र सुरक्षाकर्मीबिच झडप भएको, प्रदर्शनकारीले प्रहरीमाथि ढुंगा प्रहार गरेको, व्यक्तिको घरमा ढुंगा हान्ने र आगजनी गर्ने काम गरेको पाइएको विज्ञप्तीमार्फत जानकारी दिएको छ ।
आयोगको अनुगमन टोलीमाथि प्रदर्शनकारीबाट कोटेश्वरमा सांघातिक आक्रमण गरी अनुगमन टोलीमा संलग्न कर्मचारीलाई घाइते भएको आयोगका प्रवक्ता डा.टिकाराम पोखरेलले बताए । कुनै पनि बहानामा हिंसात्मक गतिविधि र अरुको अधिकारको उपभोगमा अवरोध गर्ने कार्य स्वीकार गर्न नसकिने पोखरेलले उल्लेख गरे । हिंसात्मक कार्यमा संलग्न जोकोहीलाई कानूनी दायरामा ल्याई कारवाही गर्न आयोगले सरकारलाई आग्रह गरेको छ ।
